ՆԱԽԱԲԱՆ (Նախածրագիր)

Հանրությանը ներկայացվող այս աշխատությունն իր տեսակի մեջ նախադեպը չունեցող, նոր մոտեցումներով և ձևաչափով աշխատանք է, որը դուրս է ընդունված ակադեմիական մոտեցումից ու սկզբունքներից: Այստեղ փորձ է արվել, հնարավորության սահմաններում, ձերբազատվել կամ ճշտել այն չափանիշները, որոնք մեզ մատուցվում կամ թելադրվում են մեր զարգացման ողջ ընթացքում: Մանկությունից մեզ թելադրվել են այնպիսի անստույգ տվյալներ, որոնք ստացել ենք մեր ծնողներից, կրթական տարբեր հաստատություններից ներս (մանկապարտեզ, դպրոց, բուհ և այլն), որոնք ընկալվել և հաստատվել են որպես չափանիշ: Սերտված նման անստույգ տվյալները, մեր զարգացման ընթացքում, գլխուղեղում ձևավորվում են և վերածվում հիմնավոր չափանիշների: Հե­տագայում մարդը շրջապատից ստացած ամեն մի նոր տեղեկատվություն համեմատում և զուգադրում է իր մեջ արդեն իսկ եղած այդ անստույգ կամ թվացյալ ստուգված տվյալների հիման վրա ձևավորված չափանիշների հետ: Իսկ համեմատությունը համարվում է տրամաբանական անալիզի կարևորագույն միջոցը: Նման անստույգ կամ թվացյալ ստուգված կեղծ չափանիշները մարդու գլխուղեղում, համեմատական մեթոդով, ստեղծում են տրամաբանական կեղծ իմացաբանություն: Այդ անստույգ չափանիշ­ների հենքի վրա ձևավորված և դրանց վրա հենված տրամաբանությունը նման է այն խնդրի լուծմանը, որի տվյալներից մեկը սխալ է: Բնականա­բար, տվյալ խնդրի լուծումից էլ կունենանք պատասխան, որը կընկալենք որպես ճիշտ և այդ պատասխանը օգտագործելով մեկ այլ խնդրում` կու­նենանք պրոգրեսիվ աճող անճշտությունների շարք, որն ընդունվում է որպես ճշմարտություն՝ հիմք հանդիսանալով նոր «բացահայտումների»:

Գաղտնիք չէ, որ այսօր գիտական աշխատությունները հիմնավոր­վում են իրենց հղումների քանակով, որով հեղինակը` վկայակոչելով տար­բեր տիտղոսակիր մասնագետների աշխատանքներ, «ամրապնդում» և արժևորում է իր կատարած աշխատանքը: Նման դեպքերում է, որ վստահելով տիտղոսին, օգտվում են թվացյալ ստուգված տվյալներից ու խթանում պրոգրեսիվ աճող սխալների արատավոր զարգացմանը:

Թերևս, դժվար է այսօրվա մարդուն ներկայացնել ճշտված մի պատ­մություն, որը դարեր շարունակ ներկայացվել է այլ մոտեցումներով, և շատ հաճախ հիմնված է անստույգ կամ աղավաղված պատմական տվյալների վրա: Նման աղավաղված պատմական տվյալները մասնա­գետները «բացահայտել» և մեկնաբանել են իրենց տարբեր հուզական «համոզիչ փաստարկներով», որն այսօր դարձել է մարդկության «միսն ու արյունը»:

Նման պայմաններում հակառակ գնալ վաղուց ևեթ հաստատված մոտեցումներին և փորձել բացահայտել ճշմարտություն՝ նույնն է, թե ճա­կատով քանդել բետոնե պատը, որն էլ գիտակցելով հանդերձ, փորձել ենք իրագործել...

Միայն տեղեկատվական «գիտելիքներով» հագեցած շատ ու շատ «մասնագետների» անհասկանալի կամ անհեթեթ կթվան աշխատությու­նում տեղ գտած մտքերը, որովհետև դրանք կարող են իրենց «գիտելիք­ներից» այն կողմ չանցնել, քանի որ հակասություն կառաջանա իրենց հին ինֆորմացիոն չափանիշի և նոր փաստի միջև, որի արդյունքում, բնակա­նաբար, չի ընդունվի նորը...

Գրքի առաջնակարգ ծրագիրն է ներկայացնել.

1-ին՝ մեր հզոր ԱՐ-ԱՐ-(օղ) ԱՐ(և)ին:

2-րդ` ճշտել մարդկության մեջ տարածված պոեմների, լեգենդների, էպոսների և առասպելների իրական հեղինակներին և պարզել նրանց ծավալած նպատակային գործունեությունը:

3-րդ՝ բացահայտել «կեղծիք» ծնող և տարածող հեղինակներին: Ցույց տալ «կեղծիք»-ի ստեղծման ու տարածման անհրաժեշտության պատճառները...

Հաշվի առնելով միֆապատումների անստույգ մեկնաբանություն­ները մասնագետների կողմից, ովքեր, շեղվելով թեմայից, այն վերածել են «աստվածային թնջուկի», նույն սխալը չկրկնելու համար գրքում առաջա­դրված է «Կանոնակարգ», որում նշված են առաջնահերթության անհրա­ժեշտ պայմանները:

Գիրքն ունի հետևյալ կառուցվածքը.

Ներկայացվել են միֆապատումները (համառոտ), քանի որ պա­տումներում հիմնականում խոսվում է «Աշխարհի ստեղծումը» թեմայից, ապա ներկայացվել են նաև ժամանակակից աստղագիտական տեսու­թյուններ և նոր հայտնություններ: Բացահայտված են որոշ բառերի հա­վաստի արմատները, որոնք իրենց հերթին, լույս են սփռում աստվածների ստույգ դերակատարումների վրա: Ներկայացված պատումների և աստ­ղագիտության փաստերի հիման վրա կատարվել է նյութերի բաղդատում և համեմատական մեկնաբանություններ: Թեման ընկալելու համար խոր­հուրդ է տրվում ընթերցման ընթացքում բավարարվել միայն գրքում զե­տեղված «Պատմական և գիտական տեղեկույթների համեմատական անցկացնելու ընդունված կարգը» ենթագլխի փաստարկներով, որը ներ­կայացվում է 3-րդ՝ «Նյութերի բաղդատում և մեկնաբանություն», 4-րդ` «Նյութերի բացահայտում և եզրակացություն» գլուխներում: Առժամանակ խորհուրդ է տրվում հրաժարվել սեփական մոտեցումներից ու չափանիշ­ներից` մինչև նյութի ամբողջական ծանոթացումն ու ընկալումը, որից հե­տո նոր միայն համեմատել անձնական տրամաբանական չափանիշների հետ:

Գրքում արծարծված ու բացահայտված թեմաները բազմազան են և ամեն մեկը խորը վերլուծության կարիք ունի, որի համար անհրաժեշտ է նոր մոտեցում ցուցաբերող մասնագետների մասնակցությունն ու միաս­նական աշխատանքը, որպեսզի հնարավոր լինի վերականգնել դարերով կատարված պրոգրեսիվ աղճատումները:

Սա մի նոր քայլ է մտածողության և իրողության նոր սահմանների բացահայտման, այլափոխված, աղճատված ու թելադրված չափանիշնե­րը զատորոշելու և ճշմարտության նոր ուղի բացահայտելու համար:

Աշխատությունը նախատեսված է պատմագետների, աստղագետ­ների, երկրաբանների, լեզվաբանների և այն ընթերցողների համար, ով­քեր միտված են ծանոթանալ և իրենց համար բացահայտել նոր մոտե­ցումներ ու տեսակետներ, որը նոր մտածողության և շարադրանքի, ճշմարիտ չափանիշներ ստեղծելու լավագույն օրինակ է...

 P. S. Գիրքը հեղինակի միակ աշխատությունն է: Բնականաբար ցանկալի չէ, որ այն արժանանա համաշխարհային կինեմատոգրաֆի ա­մենահայտնի աստղ՝ Չարլի Չապլինի ցուցադրած «տարբեր դիրքերի հարմարեցվող պատգարակի», կամ «զարթուցիչով ժամացույցի» ճակա­տագրին. (Երբ անկարող մարդը (Չապլինը) նավի տախտակամածի վրա չի կարողանում պատգարակը բացել, որոշում է, որ պատգարակը ան­սարք է և շպրտում է ծովը, իսկ ապիկար ժամացույց վերանորոգող «մասնագետը» («ժամագործ» Չապլինը) պահածոյի բացիչով է բացում ժամացույցը...)

Բորիս Գաբրիելյան